Afskriftir

Afskrifaðu skemmdar, týndar eða teknar vörur úr birgðum

Afskriftir gera þér kleift að fjarlægja vörur úr birgðum þegar þær eru ekki lengur seljanlegar — t.d. vegna skemmda, ef þær týnast, eða ef þær eru teknar sem sýnishorn. Hver afskrift myndar birgðahreyfingu af tegundinni WRITEOFF sem lækkar birgðastöðu vörunnar og skráist í afskriftasöguna ásamt ástæðu, athugasemd og hver skráði. Afskriftirnar draga niður úr valda vöruhúsinu og út úr FIFO-kostnaðarlögum vörunnar, þannig að kostnaðarverð birgða helst rétt.

Síðuna finnur þú undir Vörur & lager → Afskriftir. Hún skiptist í tvo hluta: kortið „Ný afskrift" efst þar sem þú skráir eina eða fleiri afskriftir í einni færslu, og kortið „Afskriftasaga" neðar sem sýnir allar fyrri afskriftir með leit, dagsetningarsíu og síðuskiptingu.

Stækka

Afskriftasaga með dagsetningu, vöru, magni, kostnaðar- og útsöluverði, ástæðu og hver skráði

Afskriftasagan er í raun sía á birgðahreyfingar (movementType = WRITEOFF). Þess vegna birtast sömu færslurnar einnig undir Vörur & lager → Birgðahreyfingar ásamt öllum öðrum birgðahreyfingum.

Kortið „Ný afskrift" — reitir og stýringar:

Reitur	Lýsing	Skylda
Vöruhús	Fellilisti efst í kortinu („Vöruhús:"). Ræður úr hvaða vöruhúsi afskriftin dregur. Sýnir kóða og heiti hvers vöruhúss (t.d. „AÐAL – Aðalgeymsla"). Forvalið er þitt sjálfgefna vöruhús, annars aðalvöruhúsið eða það fyrsta í listanum. Sama vöruhús gildir fyrir allar línur í færslunni.	Nei (fyllist sjálfkrafa)
Vara	Leitarreitur („Leita að vöru…") í hverri línu. Leitaðu eftir vörunúmeri (SKU) eða vöruheiti og veldu vöruna. Þegar vara er valin les kerfið birgðastöðu hennar (heildarstöðu á öllum vöruhúsum) og setur hana sem hámark í Magn-reitinn.	Já
Magn	Talnareitur. Fjöldi eininga sem á að afskrifa. Lágmark er 1 og hámark er birgðastaða vörunnar (ef hún er þekkt), annars stórt hámark. Skráð magn er sjálfkrafa fært sem lækkun (mínus) í birgðahreyfinguna.	Já
Ástæða	Fellilisti með valkostunum Skemmt, Týnt og Sýnishorn. Verður að velja ástæðu til að línan teljist gild.	Já
Athugasemd	Frjáls texti („Ath...") með nánari lýsingu, t.d. „Pakkning opnaðist við flutning". Valfrjálst.	Nei

„Setja á allt" — fjöldaaðgerð: Ofan við línurnar er grá stika þar sem þú getur valið ástæðu og/eða slegið inn athugasemd og smellt á „Setja á allt". Þá er sama ástæða og/eða athugasemd sett á allar línurnar í einu. Ef hvorki ástæða né athugasemd er valin birtist viðvörunin „Veldu ástæðu eða sláðu inn athugasemd".

Veldu vöruhús

Efst í „Ný afskrift" kortinu velur þú vöruhúsið sem afskrifa á úr í fellilistanum „Vöruhús:". Sjálfgefna vöruhúsið þitt er forvalið, en þú getur skipt yfir í annað án þess að breyta úthlutun þinni.

Veldu vöru

Í línunni smellir þú á „Leita að vöru..." og leitar eftir vörunúmeri eða vöruheiti. Þegar þú velur vöruna les kerfið birgðastöðu hennar og setur hana sem hámark í magnreitinn.

Sláðu inn magn

Skráðu fjölda eininga sem á að afskrifa í Magn-reitinn. Lágmark er 1 og hámark er birgðastaða vörunnar.

Veldu ástæðu

Veldu ástæðu í fellilistanum: Skemmt, Týnt eða Sýnishorn. Ástæða er skylda — án hennar telst línan ekki gild.

Skráðu athugasemd (valfrjálst)

Skrifaðu nánari lýsingu í „Ath..." reitinn ef við á, t.d. „Rakaskemmd í geymslu".

Bættu við fleiri línum ef þarf

Smelltu á „Bæta við línu" til að afskrifa fleiri vörur í sömu færslu. Notaðu „Setja á allt" til að setja sömu ástæðu/athugasemd á allar línurnar. Til að fjarlægja línu smellir þú á rauða X-hnappinn hægra megin (óvirkur ef aðeins ein lína er eftir).

Afskrifaðu

Smelltu á rauða hnappinn „Afskrifa". Allar gildar línur eru skráðar í einni færslu — hver lína verður sér birgðahreyfing, birgðastaðan lækkar og kerfið staðfestir með t.d. „3 afskriftir skráðar". Línurnar hreinsast og afskriftasagan endurhleðst.

Aðeins gildar línur eru skráðar. Lína telst gild ef hún hefur bæði vöru, magn stærra en 0 og ástæðu. Ef engin lína uppfyllir þetta birtist villan „Fylltu út a.m.k. eina línu með vöru, magni og ástæðu" og ekkert er skráð.

Allt eða ekkert. Ef ein lína hafnast (t.d. vegna ónógrar birgðastöðu) er engin lína skráð og línurnar standa óbreyttar svo þú getir lagað þær og smellt aftur á „Afskrifa". Hver lína ber auðkenni, svo ef sama afskrift er send aftur (t.d. eftir sambandsrof þar sem óljóst var hvort hún tókst) er engin lína afskrifuð tvisvar — kerfið lætur þá vita hve margar línur voru þegar skráðar.

Afskrift getur ekki farið með birgðastöðu vörunnar undir núll nema vöru sé leyft að fara í mínus (rofinn „Leyfa neikvæðar birgðir" á vörunni, eða stillingin „Leyfa sölu á neikvæðum birgðum" undir Stillingar → Vörur & lager → Lagerstillingar). Annars hafnar kerfið færslunni með „Ekki næg birgðastaða". Þjónustuvörur eru undanþegnar birgðaeftirliti.

Vörur með raðnúmera- eða lotuskráningu er ekki hægt að afskrifa á þessari síðu: kerfið krefst raðnúmers eða lotunúmers fyrir hverja hreyfingu slíkrar vöru, og afskriftaformið hefur ekki þá reiti, svo færslunni er hafnað. Sama gildir um uppskriftir, sem eiga engar birgðir sjálfar — afskrifaðu þá hráefnin í staðinn.

Ástæður afskrifta:

Ástæða	Litur	Notkun
Skemmt	Rauður	Vörur sem skemmdust — t.d. við flutning, geymslu eða rakaskemmd
Týnt	Appelsínugulur	Vörur sem hafa týnst eða vantar við talningu
Sýnishorn	Blár	Vörur teknar sem sýnishorn, til prufu eða kynningar

Kortið „Afskriftasaga" — dálkar: Neðra kortið sýnir töflu yfir allar fyrri afskriftir. Magn birtist með rauðum lit sem jákvæð tala (fjöldi eininga sem afskrifaðar voru), og ástæðan er sýnd sem litamerki (tag) eftir töflunni hér að ofan. Dálkurinn Kostnaðarverð sýnir kostnaðarverð afskrifaða magnsins (FIFO-kostnaður, annars skráður kostnaður vörunnar) og Útsöluverð sýnir útsöluverð vörunnar eins og það var þegar afskriftin var skráð. Eldri afskriftir, gerðar áður en útsöluverð fór að vistast með þeim, sýna núverandi vöruverð með merkinu „áætlað". Neðst í töflunni er samtölulína fyrir magn, kostnaðarverð og útsöluverð þeirra afskrifta sem sýndar eru (miðað við síu og síðu); ef hluti útsöluverðsins er áætlaður stendur „(að hluta áætlað)" við samtöluna. Afskriftir sem bera aðra ástæðu en þær þrjár sem formið býður (t.d. eldri eða innfluttar færslur) birtast með gráu merki.

Dálkur	Lýsing
Dags.	Dagsetning afskriftar á sniðinu DD.MM.ÁÁ
Vörunr.	Vörunúmer (SKU) vörunnar
Vara	Heiti vörunnar
Magn	Fjöldi afskrifaðra eininga (birtist með rauðum lit)
Kostnaðarverð	Kostnaðarverð afskrifaða magnsins (úr FIFO-lögum, annars einingakostnaður × magn)
Útsöluverð	Útsöluverð afskrifaða magnsins eins og það var við skráningu; merkt „áætlað" ef sýnt er núverandi vöruverð
Ástæða	Litamerki: Skemmt (rautt), Týnt (appelsínugult) eða Sýnishorn (blátt)
Ath.	Athugasemd sem skráð var við afskriftina
Af	Fullt nafn þess sem skráði afskriftina

Leit og síun í afskriftasögu:

Stýring	Lýsing
Leita	Leitarreitur („Leita í vörunúmeri eða vöruheiti...") efst í kortinu. Leitar á öllum afskriftum (ekki bara núverandi síðu). Leitin bíður í augnablik (debounce) og fer sjálfkrafa á fyrstu síðu þegar leitarorð breytist.
Frá / Til	Dagsetningarsía (RangePicker) á sniðinu DD.MM.ÁÁÁÁ. Sýnir aðeins afskriftir á völdu tímabili.
Endurhlaða	Hnappur með uppfærslutákni sem sækir afskriftasöguna aftur frá kerfinu.
Síðuskipting	Neðst í töflunni. Sjálfgefið 20 raðir á síðu, og hægt að breyta fjölda með síðustærðarvalinu.

Þú getur afskrifað margar vörur í sömu færslu og beitt sömu ástæðu á allar línurnar með „Setja á allt" til að flýta fyrir — t.d. þegar þú afskrifar heilan skemmdan sendingu eða leiðréttir eftir birgðatalningu.

Afskrift lækkar birgðastöðuna strax og er ekki hægt að afturkalla af þessari síðu. Ef þú afskrifar vöru fyrir mistök þarftu að leiðrétta stöðuna á annan hátt til að bæta vörunni aftur inn — t.d. með birgðatalningu (Vörur & lager → Talningar) eða skynditalningu úr aðgerðavalmynd vörunnar á vörulistanum.

Afskrift dregur út úr FIFO-kostnaðarlögum vörunnar á vegnu meðaltali elstu laganna, þannig að kostnaðarverð og framlegð annarra birgða haldast rétt. Afskriftin myndar enga færslu í fjárhag — hún skráir birgðahreyfinguna og kostnaðinn hennar, og lækkar þar með birgðaverðmætið.

Tengdar síður