Kafli: Fyrstu skrefinBútur 3 af 30:56

Kerfisleit

Finndu reikninga, pantanir, tilboð, vörur, viðskiptavini og lánardrottna á einum stað með Ctrl+K, og þrengdu leitina með tegundarorðum og síum.

Prófaðu þetta í þínu kerfi

0:00 / 0:56

Kerfisleit

Hraði

Handbókin

Uppskrift

Fylgja myndbandinu

Lesa síðuna í heild

Kerfisleit

Finndu reikninga, pantanir, tilboð, vörur, viðskiptavini og lánardrottna á einum stað með ⌘K

Kerfisleitin er leitarreiturinn efst í mælaborðinu. Þú opnar hana með því að smella á hann eða slá ⌘K (Ctrl+K á Windows og Linux) hvar sem er í kerfinu. Hún leitar þvert á sex tegundir í einu og skilar niðurstöðunum í hópum eftir tegund, með fjöldatölu við hvern hóp. Þú þarft ekki að vita hvar færslan er geymd — skrifaðu bara það sem þú manst.

Kerfisleit opin með tegundarorðum og síum

Stækka

Kerfisleitin opnuð með ⌘K eða Ctrl+K: tómur reitur sýnir tegundarorðin og dæmi um síur

Tegund	Leitað er í
Reikningar	Reikningsnúmer, nafn viðskiptavinar, kennitala, tilvísun
Pantanir	Pöntunarnúmer, nafn viðskiptavinar, kennitala, tilvísun
Tilboð	Tilboðsnúmer, nafn viðskiptavinar, kennitala, tilvísun
Vörur	Heiti, vörunúmer (SKU), lýsing, vefheiti
Viðskiptavinir	Nafn, kennitala, netfang, sími, staður
Lánardrottnar	Nafn, kennitala, tengiliður, netfang, sími, staður

Þú sérð aðeins þær tegundir sem heimildir þínar leyfa. Notandi með aðgang að reikningum en ekki viðskiptavinaskránni fær engar viðskiptavinaniðurstöður — þær hverfa þegjandi, án villuboða. Tveir notendur geta því fengið ólíkar niðurstöður fyrir nákvæmlega sömu fyrirspurn.

Leita í einni tegund

Skrifaðu tegundarorð fremst í reitinn og bil á eftir. Orðið breytist í bláan kubb og leitin þrengist við þá tegund. Þú getur líka smellt á orðin í listanum sem birtist þegar reiturinn er tómur.

Tegund	Orð sem virka
Reikningar	`rei`, `reikn`, `inv`
Pantanir	`pnt`, `pöntun`, `pontun`, `ord`
Tilboð	`til`, `tilb`, `quo`
Vörur	`vara`, `prd`, `sku`
Viðskiptavinir	`kúnni`, `kunni`, `cust`
Lánardrottnar	`birgi`, `sup`

Tegundarorð virka aðeins fremst í reitnum, og aðeins þegar bil fylgir þeim. Þetta er af ásettu ráði: annars myndi leit að viðskiptavininum „Bergur vara ehf." missa orðið „vara" úr nafninu. Um leið og orð er ekki sía verður allur afgangurinn leitartexti.

Þrengja með síum

Síur eru skrifaðar með tvípunkti svo þær rekist aldrei á venjuleg orð. Þær má sameina — rei stada:ógreitt upph:>100000 finnur ógreidda reikninga yfir 100.000 kr.

Sía	Snið	Dæmi
Staða	`stada:<orð>`	`stada:ógreitt`
Dagsetningabil	`dags:<frá>..<til>`	`dags:2026-01..2026-06`
Frá og með	`dags:><dagsetning>`	`dags:>2026-01-01`
Einn mánuður	`dags:<ár-mánuður>`	`dags:2026-05`
Lágmarksupphæð	`upph:><tala>`	`upph:>100000`
Upphæðarbil	`upph:<frá>..<til>`	`upph:10000..50000`
Mínar færslur	`mínar`, `minar`, `mín`, `min`, `mine`	`mínar`

Bil í gildi eru rituð með bandstriki, því bil slítur síuna: stada:í-vinnslu, ekki stada:í vinnslu. Einn mánuður þenst sjálfkrafa út í heilan mánuð — dags:2026-05 þýðir 1.–31. maí 2026.

Stöðuorð

Stöðuorðin virka þvert á tegundir. Sama orð getur þýtt mismunandi hluti eftir tegund — „niðurfellt" er ein staða á pöntun og önnur á tilboði — og leitin sér um að finna réttu kóðana í hverju tilviki. Slærðu inn orð sem er ekki á listanum verður það ekki að síu, heldur helst sem venjulegur leitartexti. Þannig geturðu ekki óvart síað burt allar niðurstöður.

Staða	Með íslenskum stöfum	Án íslenskra stafa
Ógreitt	`ógreitt`	`ogreitt`
Greitt	`greitt`	`greitt`
Að hluta	`að-hluta`	`ad-hluta`
Drög	`drög`	`drog`
Sent	`sent`	`sent`
Í vinnslu	`í-vinnslu`	`i-vinnslu`
Niðurfellt	`niðurfellt`	`nidurfellt`
Tímabært	`tímabært`	`timabaert`
Samþykkt	`samþykkt`	`samthykkt`
Hafnað	`hafnað`	`hafnad`
Útrunnið	`útrunnið`	`utrunnid`
Bíður	`bíður`	`bidur`
Staðfest	`staðfest`	`stadfest`
Afhent	`afhent`	`afhent`
Í flutningi	`í-flutningi`	`i-flutningi`
Reikningsfært	`reikningsfært`	`reikningsfaert`
Virkt	`virkt`	`virkt`
Óvirkt	`óvirkt`	`ovirkt`

Hvernig leitin finnur það sem þú skrifar

Leitin notar fjórar aðferðir. Nákvæm samsvörun og forskeyti raðast efst, orðaleit finnur restina og innsláttarvillur eru aðeins leitaðar uppi þegar ekkert annað finnst. Þú þarft ekki að gera neitt sérstakt — hún skiptir sjálf um aðferð þegar þarf.

Aðferð	Hvað hún gerir	Dæmi
Nákvæm samsvörun	Skjalanúmer eða nafn sem passar alveg fer efst	`SR-2026-0412`
Forskeyti	Byrjunin á númeri eða nafni dugar — þú þarft ekki að klára það	`SR-2026` finnur alla reikninga ársins (forskeytið fer eftir stillingum)
Orðaleit	Hvert orð í nafni, kennitölu eða tilvísun er leitarhæft	`bergur` finnur „Bergur ehf." og öll skjölin hans
Innsláttarvillur	Ef ekkert finnst er leitað að því sem líkist mest	`bergru` finnur samt „Bergur"

Þú þarft engin jokeratákn. Það eru engin * eða % í kerfisleitinni og þeirra er ekki þörf — forskeytisleit er sjálfvirk og innsláttarvillur eru fyrirgefnar. Slærðu inn % eða _ er farið með þau sem venjulega stafi.

Þú mátt sleppa íslenskum stöfum. Leitin jafnar á við a, þ við th, æ við ae, ö við o og svo framvegis — í báðar áttir. thorunn finnur „Þórunn", aegir finnur „Ægir" og gardlist finnur „Garðlist".

Leitin þarf að minnsta kosti tvo stafi áður en hún byrjar. Hún sýnir fimm efstu niðurstöðurnar í hverjum hópi; talan við hóphausinn segir hversu margar fundust alls.

Hvert opnast færslan?

Reikningar, pantanir og tilboð opnast á sinni eigin síðu. Vörur og lánardrottnar opnast í spjaldi á viðkomandi lista. Viðskiptavinir opnast á söluborðinu með viðskiptavininn valinn — þar sérðu stöðuna hans, reikninga, tilboð og pantanir og getur selt á hann strax. Viltu breyta stofnupplýsingunum ferðu í Sala → Viðskiptavinir.

Lyklaborðsstýring

Lykill	Aðgerð
⌘K / Ctrl+K	Opna leitina hvar sem er í mælaborðinu
↑ ↓	Færa valið, þvert á alla hópa
↵	Opna völdu færsluna
⌘↵ / Ctrl+↵	Opna í nýjum flipa — leitin helst opin svo þú getir opnað fleiri í röð
Esc	Hreinsar fyrst leitartextann, svo síurnar, og lokar loks glugganum
Backspace	Á tómum reit: fjarlægir síðustu síuna

Næst · Bútur 1 af 2

Prófíllinn þinn

Mínar upplýsingar í stuttu máli — prófílmynd, tungumál og flýtileiðir, push-tæki, tveggja þátta auðkenning, lotur, persónuupplýsingar, lykilorð og innskráningarsaga.

Horfa á næsta bút · 1:11