Greiðslumátar

Greiðslumátar sölu, bókhaldslyklar þeirra og útlit á söluborði

Á síðunni Greiðslustillingar (Stillingar → Innheimta & banki → Greiðslumátar) heldurðu utan um greiðslumáta fyrirtækisins í sölu. Hver greiðslumáti ræður á hvaða bókhaldslykil greiðslan bókast, hvort hún er skráð strax þegar reikningur er bókaður og hvernig takkinn lítur út í afgreiðslu. Greiðslumátarnir birtast á söluborði (POS) og þegar greiðsla er skráð á sölureikning eða innborgun á pöntun.

Greiðslustillingar — listi yfir greiðslumáta

Stækka

Greiðslustillingar: greiðslumátar með samþættingu, bókhaldslykli og stöðu

Síðan geymir nú aðeins greiðslumáta. Efst er upplýsingaborði: „Uppgjör og posastillingar eru nú undir Stillingar → Korta- og posatengingar“. Tengingar við kortauppgjörsþjónustu (Teya), greiðsluposar og posaúthlutun eru á síðunni Korta- og posatengingar; bankareikningar og innheimtuþjónustur eru á Bankatengingar.

Listinn

Efst til hægri er takkinn Endurhlaða, sem sækir greiðslumáta og posa aftur. Fyrir ofan töfluna er blái takkinn Nýr greiðslumáti og leitarreiturinn „Leita eftir nafni eða kóða…“, sem síar bæði eftir nafni og kóða. Neðst sést fjöldinn („Samtals X greiðslumátar“) og hægt er að breyta fjölda raða á síðu (sjálfgefið 10). Á mjóum skjá skrunast taflan til hliðar.

Dálkur	Lýsing
(dragtákn)	Handfang til að draga raðir og breyta röð greiðslumáta. Röðin ræður birtingarröð í afgreiðslu og vistast strax.
Nafn	Nafn greiðslumátans ásamt tákni og litamerki ef valið. Grænt merki Sjálfgefinn og blátt Kerfismáti birtast hér þegar við á.
Kóði	Innri kóði greiðslumátans, t.d. BANK_TRANSFER, CASH, CARD eða HEIMABANKI.
Samþætting	Litamerki: Handvirkt, Heimabanki, Greiðsluposi, Greiðslutengill eða Fjargreiðsla.
Bókhaldslykill	Tengdur lykill (númer og heiti), eða „Ekki tengdur“.
Staða	Grænt Virkur eða grátt Óvirkur.
Söluborð	Blátt Já ef mátinn er sýndur í afgreiðslu og greiðsluskráningu, annars grátt Nei.
Farsímaapp	Blátt Já ef mátinn býðst þegar reikningur er stofnaður í farsímaappinu, annars grátt Nei (sjálfgefið).
Greiðsluskráning	Appelsínugult Bíður greiðslu ef greiðslan er ekki skráð þegar reikningurinn er bókaður, annars grátt Skráð strax. Spurningarmerkið við fyrirsögnina skýrir þetta.
Aðgerðir	Takkarnir Breyta, Sjálfgefinn (aðeins ef mátinn er ekki sjálfgefinn nú þegar) og Eyða. Kerfismáti sýnir í staðinn læst merki Kerfismáti og engar aðgerðir.

Þú raðar greiðslumátum með því að draga raðir í töflunni. Röðin vistast um leið — enginn „Vista“-takki. Mistakist vistunin birtist „Villa við að uppfæra röðun“ og listinn er sóttur aftur.

Opna „Nýr greiðslumáti“

Smelltu á bláa takkann „Nýr greiðslumáti“. Gluggi með fyrirsögninni „Nýr greiðslumáti“ opnast.

Nafn og kóði

Fylltu inn „Nafn“ (t.d. Millifærsla) og veldu „Kóði“: Millifærsla, Reiðufé, Greiðslukort, Beingreiðsla, Heimabanki, Greiðslutengill, Kortasímgreiðsla eða Annað. Veljirðu „Annað“ birtist „Sérsniðinn kóði“ — 2–20 hástafir (A-Z) eða undirstrik; aðrir stafir eru fjarlægðir jafnóðum. Kóðinn má hvorki vera frátekinn (t.d. INNEIGN) né þegar í notkun.

Samþætting

Í „Samþætting“ velurðu hvernig mátinn virkar: Handvirkt, Heimabanki, Greiðsluposi, Greiðslutengill (PayByLink) eða Kortafærsla (fjargreiðsla). Handvirkt er sjálfgefið.

Bókhaldslykill — fer eftir kóðanum

Almennt velurðu „Bókhaldslykil“; aðeins virkir lyklar á bilinu 3200–3299 birtast. Fyrir Millifærslu kemur í staðinn reiturinn „Bankareikningur“ (skylda) og lykillinn er tekinn af bankareikningnum — hann birtist undir reitnum („Bókhaldslykill: …“). Fyrir Heimabanka er enginn lykill valinn hér; í stað reitsins stendur að bókhaldslykillinn fylgi bankareikningi innheimtuþjónustunnar sem krafan stofnast á.

POS Terminal (ef Greiðsluposi)

Sé samþættingin „Greiðsluposi“ birtist reiturinn „POS Terminal“ og hann er skylda. Aðeins virkir posar af síðunni Korta- og posatengingar birtast.

Útlit takkans

Veldu „Litur á takka“ (litaval með ráðlögðum litum) og „Tákn á takka“ (Peningar, Kort, Greiðsluposi, Sími, Tengill, Millifærsla, Banki eða Veski). Þetta ræður útliti takkans í afgreiðslu.

Texti á reikningi

Í „Texti á reikningi“ (allt að 300 stafir) skrifarðu texta sem prentast undir greiðslumátanum á PDF-reikningum, t.d. greiðsluupplýsingar fyrir millifærslu. Textinn birtist ekki á fullgreiddum reikningi.

Rofar

Stilltu rofana „Þarf bankareikning?“ (ekki sýndur fyrir Millifærslu), „Virkur“, „Sýna á söluborði“, „Sýna í farsímaappi“, „Sjálfgefinn“ og „Styður neikvætt?“. Þegar samþættingin er „Handvirkt“ og kóðinn er ekki Heimabanki birtist líka „Skrá ekki greiðslu strax“.

Vista

Smelltu á „Vista“. Takkinn verður grænn með „Vistað“ og „Greiðslumáti stofnaður“ (eða „Greiðslumáti uppfærður“) birtist.

Reitur	Lýsing	Skylda
Nafn	Heitið sem birtist í afgreiðslu, greiðsluskráningu og á reikningi	Já
Kóði	Fyrirfram skilgreindur kóði eða „Annað“. Kóða greiðslumáta sem er í notkun er ekki hægt að breyta	Já
Sérsniðinn kóði	Aðeins ef „Annað“; 2–20 hástafir/undirstrik, einkvæmur	Já ef „Annað“
Samþætting	Handvirkt / Heimabanki / Greiðsluposi / Greiðslutengill (PayByLink) / Kortafærsla (fjargreiðsla)	Já
Bókhaldslykill	Lykill á bilinu 3200–3299. Ekki sýndur fyrir Millifærslu og Heimabanka	Nei
Bankareikningur	Aðeins fyrir Millifærslu; virkir bankareikningar; ræður bókhaldslyklinum	Já ef Millifærsla
POS Terminal	Aðeins ef samþætting = Greiðsluposi; virkir posar	Já ef Greiðsluposi
Litur á takka	Litur takkans í afgreiðslu	Nei
Tákn á takka	Tákn takkans í afgreiðslu	Nei
Texti á reikningi	Allt að 300 stafir undir greiðslumáta á PDF-reikningi	Nei
Þarf bankareikning?	Þegar greiðsla er skráð á reikning með þessum máta þarf að velja bankareikning	Nei
Virkur	Óvirkur máti birtist ekki við greiðsluskráningu	Nei
Sýna á söluborði	Slökkt = mátinn birtist hvorki á söluborði né í greiðslu- og innborgunargluggum	Nei
Sýna í farsímaappi	Kveikt = mátinn býðst í greiðslumátavali þegar reikningur er stofnaður í farsímaappinu. Sjálfgefið slökkt	Nei
Sjálfgefinn	Aðeins einn greiðslumáti getur verið sjálfgefinn	Nei
Styður neikvætt?	Mátinn býðst þegar greitt er á neikvæðan reikning og við útgreiðslu inneignar á söluborði	Nei
Skrá ekki greiðslu strax	Aðeins ef Handvirkt og kóði ≠ Heimabanki; reikningurinn bíður handvirkrar greiðsluskráningar	Nei

Hvernig greiðslan bókast

Þegar greiðsla er skráð á reikning er debetfært á bókhaldslykil greiðslumátans og kreditfært á 3400 Viðskiptakröfur. Lykillinn er valinn í þessari röð:

Bókhaldslykill greiðslumátans (fyrir Millifærslu: lykill bankareikningsins sem valinn var í glugganum).
Sé enginn lykill á mátanum: lykill bankareikningsins sem valinn er þegar greiðslan er skráð.
Annars: 3200 Veltureikningur.

Greiðsla með Heimabanka (krafa) bókast á lykil bankareiknings innheimtuþjónustunnar sem krafan var stofnuð á (Bankatengingar → Innheimtuþjónustur).

Gættu að lyklunum:

„Ekki tengdur“ þýðir ekki að greiðslan bókist hvergi — hún lendir þá á 3200 Veltureikningi (eða bankareikningi sem valinn er við skráningu).
Lykill Millifærslu er afritaður af bankareikningnum þegar þú vistar. Breytirðu síðar bókhaldslykli bankareikningsins þarftu að opna greiðslumátann og vista hann aftur.
Greiðslumáti sem uppgjörstenging á Korta- og posatengingum vísar á verður að hafa bókhaldslykil: við bókun kortauppgjörs er brúttó kortasalan kreditfærð á þann lykil. Án hans stöðvast bókun uppgjörsins. Sami lykill er debetfærður þegar kortagreiðsla er skráð, svo hann virkar sem millilykill kortasölu (í sýnishornsfyrirtækinu er Greiðslukort tengt 3210 Greiðslukortauppgjör).

Rofinn „Skrá ekki greiðslu strax“ er fyrir máta þar sem peningurinn berst eftir að reikningurinn er bókaður, t.d. millifærslu. Reikningurinn er þá bókaður ógreiddur og bíður; þegar peningurinn berst skráirðu greiðsluna handvirkt. Án rofans er greiðslan bókuð um leið og reikningurinn, sem lætur hann sýnast greiddan þótt ekkert hafi borist. Rofinn birtist aðeins fyrir Handvirkt: fyrir Greiðsluposa, Kortafærslu og Greiðslutengil er greiðslan þegar staðfest við bókun, og máti með kóðann Heimabanki bíður greiðslu hvort eð er (krafan er greidd síðar og bankasamstilling skráir greiðsluna).

Greiðslumátar í farsímaappinu

Þegar reikningur er stofnaður í farsímaappinu (Sala → nýr reikningur) birtist reiturinn Greiðslumáti aðeins ef kveikt er á „Sýna í farsímaappi“ á a.m.k. einum virkum greiðslumáta. Sjálfgefið val er Ógreitt — greiðist síðar: reikningurinn bókast ógreiddur, eins og áður. Veljirðu greiðslumáta er greiðslan skráð á sama hátt og á söluborðinu — fyrir allan reikninginn, á bókhaldslykil greiðslumátans; Heimabanki stofnar kröfu og „Skrá ekki greiðslu strax“ gildir líka í appinu. Greiðslumáti sem þarf bankareikning en hefur engan bókhaldslykil er falinn í appinu með ábendingu, og Kortafærsla (fjargreiðsla) býðst ekki þar (kortanúmer viðskiptavinar er ekki slegið inn í appinu). Greiðsluposi virkar eins og á söluborðinu (Borga → Senda í posa): þegar reikningurinn hefur verið stofnaður fer greiðslubeiðni fyrir heildarupphæð hans á posann þinn og blaðið Beðið eftir posa… sýnir upphæðina, posann og hnappinn Hætta við. Greiðslan skráist sjálfkrafa þegar posinn staðfestir hana. Hafni posinn, sé hætt við eða svari hann ekki er reikningurinn áfram ógreiddur og þú velur Reyna aftur (sami reikningur; sé fyrri beiðnin enn í gangi á posanum er beðið eftir henni í stað þess að senda nýja) eða Loka. Sé þér úthlutað fleiri en einum posa birtist reiturinn Greiðsluposi með þeim posa forvöldum sem þú notaðir síðast í þessu tæki (annars sjálfgefna posanum); sé aðeins einn posi úthlutaður á þig er hann notaður beint. Sé enginn posi úthlutaður á þig er greiðslumátinn falinn í appinu með ábendingu — sjá Posaúthlutun á síðunni Korta- og posatengingar. Greiðslutengill virkar eins og „Senda greiðslutengil“ á söluborðinu: þegar hann er valinn birtast valfrjálsu reitirnir Netfang viðskiptavinar og Farsími (Teya sendir tengilinn þangað um leið og hann er stofnaður). Þegar reikningurinn hefur verið stofnaður — ógreiddur — er greiðslutengill fyrir heildarupphæð hans stofnaður og blaðið Greiðslutengill sýnir hann sem QR-kóða sem viðskiptavinurinn skannar með eigin síma, ásamt slóðinni og hnöppunum Deila (þar sem síminn býður upp á það) og Afrita. Staðan uppfærist sjálfkrafa úr Beðið eftir greiðslu… í Greitt og greiðslan skráist sjálfkrafa á reikninginn innan mínútu. Loka lokar blaðinu: reikningurinn er þá áfram ógreiddur og tengillinn virkur. Opnirðu reikninginn aftur í appinu birtist hnappurinn Sýna greiðslutengil sem sýnir sama tengil aftur — nýr tengill er ekki stofnaður fyrir sama reikning og sömu upphæð.

Kerfismátar (blátt merki „Kerfismáti“) verða til sjálfkrafa og er hvorki hægt að breyta, eyða né gera sjálfgefna. Dæmi er Inneign (kóði INNEIGN) á lykli 4405, sem er notaður þegar inneign viðskiptavinar greiðir reikning. Hann birtist ekki í lista greiðslumáta þegar greiðsla er skráð á reikning.

Aðrar aðgerðir

Breyta: opnar sama glugga með fyrirsögninni „Breyta greiðslumáta“ og forfylltum gildum.
Sjálfgefinn: gerir mátann sjálfgefinn; hinir missa merkið. Staðfesting: „Sjálfgefinn greiðslumáti uppfærður“.
Eyða: spyr „Eyða greiðslumáta?“. Greiðslumáta sem greiðslur hafa verið skráðar á er ekki hægt að eyða — gerðu hann þá óvirkan með rofanum „Virkur“.

Til að taka við greiðslu á posa í afgreiðslu skráirðu fyrst posann á Korta- og posatengingar, stofnar svo hér greiðslumáta með samþættingunni Greiðsluposi og velur posann í „POS Terminal“.

Greiðslur sem skráðar eru með þessum greiðslumátum birtast undir Innheimta → Innborganir. Kortauppgjör eru sótt og bókuð á Kortauppgjör.

Tengdar síður

Fyrri síða

Starfsmenn

Næsta síða

Korta- og posatengingar