Launamiðar
Hvar árlegu launamiðarnir til Skattsins eru, hvað stöðumerkin þýða, og hvernig þú reiknar, villuprófar, sendir og leiðréttir bunka tekjuársins.
Svo fer bunkinn úr Drögum í Villuprófað, og loks í Samþykkt af RSK. Ef eitthvað klikkar stendur Hafnað af RSK.
Launamiðar
Launamiðar (Laun → Launamiðar, slóðin /dashboard/payroll/wage-statements) reikna árleg launamiðaskil og senda þau rafrænt til RSK (Gagnaskil). Hvert tekjuár á sinn bunka af launamiðum — einn launamiða á hvern starfsmann sem fékk laun á árinu.
Efst á síðunni velurðu tekjuár (fellilisti með yfirstandandi ári og sex árum þar á undan; sjálfgefið er síðasta ár). Við hliðina sjást stöðumerki bunkans (eða „Enginn bunki"), umhverfið („Prófunarumhverfi" eða „Raunumhverfi RSK") og áminningin „Skilafrestur 20. janúar".
Allir með lesaðgang að launum sjá síðuna, töfluna, sundurliðunina, XML-skrána og kvittanir. Til að reikna, breyta, villuprófa, senda, senda afrit eða skipta um umhverfi þarf skrifaðgang að launum — án hans birtast þeir hnappar ekki og umhverfisvalið er óvirkt.
| Staða bunka | Merking |
|---|---|
| Enginn bunki | Ekkert hefur verið reiknað fyrir tekjuárið. |
| Drög | Launamiðar hafa verið reiknaðir eða þeim breytt en ekki villuprófaðir — eða villuprófun fann villur. |
| Villuprófað | Hvorki reglur kerfisins né villuprófun RSK fundu villu og bunkann má senda. |
| Sent | Sending til RSK hófst en svar barst ekki (t.d. vegna tímamarka). Tekjuárið er læst þar til staðan hefur verið athuguð — sjá viðvörunina hér fyrir neðan. |
| Samþykkt af RSK | RSK tók við sendingunni; bunkanúmer RSK sést í „Saga bunka". |
| Hafnað af RSK | RSK hafnaði sendingunni — reikna þarf aftur, laga og senda á ný (sjá „Eftir höfnun"). |
| Úrelt | Fyrri samþykktur bunki sem síðari leiðrétting (BREYTA) hefur leyst af hólmi. |
Fellilistinn efst sýnir yfirstandandi ár og sex ár þar á undan; sjálfgefið er síðasta ár.
Reiknar (eða endurreiknar) alla launamiða ársins úr launakeyrslum ársins — sjá „Hvaðan tölurnar koma". Handvirkar yfirskriftir haldast; séu einhverjar til spyr kerfið fyrst „Reikna launamiða aftur?". Villuprófaður bunki fer aftur í Drög, og starfsmaður sem á ekki lengur greiðslur á árinu dettur út nema á honum sé yfirskrift.
Keyrir fyrst reglur kerfisins. Finnist engin villa eru gögnin send í villuprófun hjá RSK (það eru ekki skil). Villuprófun RSK krefst veflykils staðgreiðslu og kennitölu fyrirtækis — líka í prófunarumhverfi. Villur og viðvaranir birtast í kössum efst og sem merki í „Athugasemdir"-dálkinum; svar RSK birtist í kössunum „Villuboð frá RSK" og „Athugasemdir frá RSK". Villur hindra sendingu, viðvaranir ekki.
Hnappurinn er aðeins virkur þegar bunkinn er Villuprófaður og engin villa er eftir. Staðfestingarglugginn segir hve margir launamiðar verða sendir og að eftir það sé aðeins hægt að breyta þeim með leiðréttingu. Í raunumhverfi opnast að auki glugginn „Staðfesta sendingu í raunumhverfi" þar sem slá þarf inn tekjuárið. Bunkinn er sendur sem nýskráning (NYSKRA) og staðan verður „Samþykkt af RSK" eða „Hafnað af RSK" eftir svari.
„Sækja XML" sækir launamiðaskrá bunkans hvenær sem bunki er til; veflykillinn er falinn (******) í skránni. „Kvittun (PDF)" virkar eftir sendingu og sækir kvittun RSK (eða prentskrá sendingarinnar frá RSK ef engin kvittun fylgdi svarinu). „Senda afrit til starfsmanna" sendir hverjum starfsmanni með skráð netfang PDF-afrit af launamiðanum sínum og sýnir hve mörg voru send, hve mörgum var sleppt og hve mörg mistókust.
Taflan „Launamiðar starfsmanna"
Dálkarnir eru Nafn, Kennitala, Laun, Staðgreiðsla, Lífeyrir, Séreign, Ökutækjastyrkur, Dagpeningar, Hlunnindi, Ráðningardagar, Athugasemdir og Aðgerðir (Breyta / Sundurliðun); á mjóum skjá falla sumir dálkar út. Hlunnindi eru summa fata-, húsnæðis-, fæðis-, bifreiða- og annarra hlunninda. Í Athugasemdum eru villukóðar sem merki — rauð fyrir villur, appelsínugul fyrir viðvaranir — og skýringin birtist þegar músin er yfir merkinu. Fjöldi launamiða sést efst til hægri á kortinu.
Á bak við töfluna eru allir 45 reitir launamiðans samkvæmt skráarlýsingu RSK — t.d. „Launatekjur og starfstengdar greiðslur (þ.m.t. orlofsfé) (reitur 02)", „Afdregin staðgreiðsla (reitur 71)", „Lífeyrissjóðsiðgjald launamanns (reitur 03)", „Iðgjald launamanns í séreignarsparnað (reitur 63)" og „Bifreiðahlunnindi (reitur 60)".
Hvaðan tölurnar koma
- Launakeyrslur: aðeins keyrslur í stöðunni Bókað, Sent eða Lokað (eldri keyrslur: Skýrslugerð) teljast með — keyrslur í Drögum eða Samþykktar en óbókaðar ekki. Keyrsla telst til þess tekjuárs sem launatímabil hennar hefst á, sömu reglu og mánaðarleg staðgreiðsluskil nota.
- Reitir: hvaða reit launalína fer í ræðst af „RSK flokkun (staðgreiðsla)" á launaliðnum (Launastillingar → Launaliðir). Flokkurinn Laun (sjálfgefinn) fer í reit 02, Dagpeningar í 17, Ökutækjastyrkur í 16 og hlunnindi í sína reiti (27, 28, 33, 34, 60). Sé dagpeninga- eða ökutækjastyrksliður ekki skattskyldur telst hann líka utan staðgreiðslu (reitir 74 og 73). Launalína í flokknum Laun sem er merkt ekki skattskyld fer ekki á launamiðann, og flokkarnir „Reiknað endurgjald" og „Stofn til fjársýsluskatts" eru ekki launamiðareitir.
- Orlofsfé sem er greitt út með launum eða lagt inn á orlofsreikning telst í reit 02, einu sinni.
- Staðgreiðsla (71) er sótt mánuð fyrir mánuð úr þeim staðgreiðsluskilum til RSK sem tókust fyrir hverja keyrslu. Þar sem engin skil liggja fyrir er notuð reiknuð staðgreiðsla launafærslnanna og viðvörun birtist.
- Lífeyrissjóðsiðgjald (03) og séreign (63) launamanns koma úr launafærslunum, skipt á sjóði, og hvort um sig er þakið við 4% af reit 02 (viðvörun ef þakið var notað). Hver sjóður þarf RSK-sjóðsnúmer og kennitölu, annars kemur villa. Fyrirtækið getur ekki skráð RSK-númer í sameiginlegu sjóðaskrána sjálft — vanti það má slá númerið inn á launamiðanum með „Breyta" (reitirnir „Númer sjóðs" og „Kennitala sjóðs").
- Ráðningardagar (83) reiknast frá upphafs- og lokadegi ráðningar starfsmannsins, takmarkað við tekjuárið.
- Neikvæð ársupphæð er send sem 0 og gefur villu þar til hún er leiðrétt í launafærslum eða yfirskrifuð. Launafærslur ársins sem eru ekki tengdar starfsmanni gefa líka villu og komast ekki á launamiða.
Yfirskrifa gildi
Meðan bunkinn er í Drögum eða Villuprófaður opnar „Breyta" gluggann „Breyta launamiða — <nafn>". Þar er hver reitur sýndur með dálkunum Reiknað, Yfirskrift og Gildandi; sjálfgefið sjást aðeins reitir með gildi, en „Sýna alla reiti" sýnir alla breytanlega reiti. Reitir með mörgum línum (sjóðir, hlunnindi og greiðslur með skýringu) eru undirtöflur með „Bæta við línu" og „Fjarlægja línu", og „Hreinsa yfirskrift" skilar reitnum aftur í reiknað gildi. Ástæða er skylda og vistast með launamiðanum.
Yfirskrifaður launamiði fær merkið „Yfirskrifað" ásamt ástæðunni við nafnið í töflunni. Vistun setur bunkann aftur í Drög, svo villuprófa þarf á ný. Yfirskrift er fast gildi: breytist launin síðar fylgir hún ekki með og þarf að uppfæra hana.
Sundurliðun
Hnappurinn „Sundurliðun" opnar „Sundurliðun — <nafn>" með launakeyrslunum að baki launamiðanum, mánuð fyrir mánuð (Mánuður, Laun, Staðgreiðsla). Efst kemur fram hvort staðgreiðslan er sótt úr skilum til RSK (grænt) eða hvort hún er að hluta áætluð úr launafærslum af því að skil vantar fyrir einhvern mánuð (appelsínugult).
Saga bunka
Taflan „Saga bunka" sýnir alla bunka tekjuársins: Dagsetning (sending, annars útreikningur), Aðgerð (Nýskráning / Leiðrétting), Bunkanúmer frá RSK, Fjöldi miða, Staða og Kvittun — PDF-tákn sem sækir kvittun hvers sends bunka.
Leiðrétta (BREYTA)
Eftir að bunki hefur verið samþykktur af RSK hverfur „Senda til RSK" og „Leiðrétta (BREYTA)" kemur í staðinn. Leiðrétting gengur svona:
- Smelltu á „Reikna launamiða" — það býr til nýjan bunka í Drögum fyrir tekjuárið úr launakeyrslunum eins og þær eru núna.
- Gerðu breytingarnar og villuprófaðu.
- Smelltu á „Leiðrétta (BREYTA)". Staðfestingin segir að leiðréttingin komi í stað bunka nr. <bunkanúmer>, og í glugganum er „Númer bunka sem verið er að leiðrétta" forútfyllt með síðasta samþykkta bunka (það verður að passa). Í raunumhverfi þarf líka að slá inn tekjuárið.
Þegar RSK samþykkir leiðréttinguna verður fyrri bunkinn „Úrelt".
Athugið: nýi bunkinn byrjar án handvirku yfirskriftanna úr fyrri bunkanum — skráðu þær aftur ef þær eiga enn við.
Eftir höfnun
Bunki sem RSK hafnaði er lokaður: hvorki er hægt að breyta honum né senda hann aftur. Lestu villuboð RSK sem birtast eftir sendinguna, lagaðu orsökina (í launakeyrslum, á launaliðum eða starfsmönnum), smelltu svo á „Reikna launamiða" til að búa til nýjan bunka, villuprófaðu og sendu aftur. Eins og við leiðréttingu fylgja handvirkar yfirskriftir úr hafnaða bunkanum ekki með.
Tengsl við aðrar einingar
Tölurnar byggja á bókuðum Launakeyrslum tekjuársins. Staðgreiðslan er tekin úr skilunum sem Staðgreiðsla sendir RSK mánaðarlega, og veflykillinn er sá sami (skráður undir Fyrirtækið). RSK flokkun launaliða er stillt í Launastillingum. Lífeyrissjóður og séreignarsjóður hvers starfsmanns eru skráðir undir Launþegum, upphafs- og lokadagur ráðningar undir Starfsmönnum, og orlofsaðferðin sem ræður því hvernig orlofsfé greiðist undir Orlofi og fyrirframgreiðslum. Samantekt yfir sömu tímabil í öðru sniði er á Launaskýrslum.
